ජනාධිපතිවරණය ප‍්‍රකාශයට පත්වී කීප දිනක් ගෙවී ගොස් හමාරය. නාමයෝජනා භාරදීමට තව ඇත්තේ දෙසතියක පමණ කාලයකි. ඉන්පසු ඡන්දයට ඉතිරි වන්නේ මාසයකට ආසන්න කාලයක් පමණි. ඒ අනුව මේ ගත වන්නේ සහ ඉදිරියට ඒමට නියමිතව ඇත්තේ දේශපාලන වේදිකාවන් ගිනිගන්නා තරමේ මැතිවරණ උණුසුමක් පැතිර යෑමට ඉඩ ඇති කාලයකි. මෙම මැතිවරණ උණුසුම නියෝජනය කරන ප‍්‍රධාන අංග දෙකෙන් එකක් වන ආයුධ සන්නද්ධ චන්ඩි පාට් මදකට පසෙකින් තබා අනෙක් අංගය වන මඩ ප‍්‍රහාර සුපුරුදු පරිදි දේශපාලන පුවත් බිහිකරමින් සිටියි.මහත්මා දේශපාලනය නොදන්නා දේශපාලකයන් සහ එය අපේක්ෂා නොකරන ජනතාවක් සිටින ශ‍්‍රී ලංකාව වැනි රටක ප‍්‍රායෝගික දේශපාලනයේ ස්වාභාවය මෙය යැයි යමෙකු තර්ක කරයිද, එහිද වරදක් කිය නොහැකිය. එය වඩ වඩාත් තහවුරු කරමින් තම මහබඹා බේරාගැනීමේ දැවැන්ත කාර්‍යයට අතගසා සිටින තොත්ත බබාලා රැල මේ දින වල රටේ ජනතාව ඇන්දවීමේ කටයුතුද ටිකෙන් ටික ආරම්භ කර ඇත. මෙය ජනතාව ඇන්දවීමක් යැයි සඳහන් කරන්නේ අන් කිසිවක් නිසා නොව සැබෑ ලෙසට ඒ කතාතුළ ඇත්තේ බොරුව සහ වංචාව පමණක්ම වන බැවිනි. මේ ලෙස ඔවුන් කරන බොරුව කුමක්දැයි නිශ්චය කර ගැනීමට අප එම කතා එකිනෙක ගෙන විමසා බැලිය යුතු වන්නේය.
මේ අන්දන්නන් අතරින් එක් අයෙකු වන ඇමති සියඹලාපිටිය නිතර නිතර දේශනා පවත්වන්නේ තම ගමේ ජනතාව ගොනාට ඇන්දවීමේ අරමුණ ඇතිවය. මෙලෙස කෑගල්ලේ රැස්වීමක ජනතාව අමතන ඇමතිතුමන් ජෙනරාල්ගේ පොරොන්දුව ඉටුකරන්නට කොහෙත්ම බැරි බව කීමේ ඊනියා උත්සාහයක නිරත වෙයි. එහිලා එතුමා මතු කරන ප‍්‍රධාන තර්කය වන්නේ ජෙනරාල්ට ජනාධිපති වීමට හැකිවුවද විධායක ජනාධිපතිධූරය අහෝසි කළ නොහැකිය යන්නයි. එය කිරීමට ඔහුට 2/3ක බලයක් අවශ්‍ය බවත් කිසිම දිනෙක පාර්ලිමේන්තුවේදී එය ලබා ගැනීමට තමන් ඇතුළු තම පක්ෂය ඉඩ නොදෙන බවත් ඔහු කෑගසා පවසයි. එබැවින්, සියඹලාපිටිය පමණක් නොව ඇමති මණ්ඩලයම ප‍්‍රවෘත්ති සාකච්ඡා කැඳවමින් මේ කියන කතාව ඇත්තක්ද? එසේ නම් ජෙනරාල්ට ජනාධිපතිධූරය අහෝසි කරන්නට බැරිද? මෙවන් ප‍්‍රශ්ණාර්ථ ගණනාවක් මේ දිනවල ඡන්ද දායකයන් වන ජනතාවගේ හිත් තුළ හොල්මන් කරන්නට පටන් ගෙන ඇත.
නමුත් සත්‍යය එය නොවේ. ජනාධිපති වීමට යමෙකුට අවශ්‍ය වන්නේ ප‍්‍රකාශිත, වලංගු ඡන්ද වලින් 50% කට වඩා දශමක් හෝ ගැනීම පමණකි. ඉන් ජනාධිපති වන ඕනෑම අයෙකුට පාර්ලිමේන්තුවේ 2/3ක එකඟතාවය මත විධායක ජනාධිපති ක‍්‍රමය අහෝසි කර අවශ්‍ය ප‍්‍රතිපාදනයන් ව්‍යවස්ථාවට එක් කිරීමේ හැකියාව පවතී. තත්වය එසේ නම් අප මොහොතකට සිතුවොත් ජෙනරාල් ජනාධිපතිවරණය ජයගත්තාය කියා. එසේ නම් දැන් රටේ විධායක බලතල හිමි ජනාධිපති ජෙනරාල්ය. (එවිට මහින්ද ප‍්‍රාදේශීය සභා මන්ත‍්‍රී කෙනෙකුට තරම්වත් බලයක් නැති සිවිල් පුරවැසියෙකු - අපේ ගොඩටම - වීමත්, එහා පැත්තට පැනපු සහ එහා පැත්තේ හිටපු ගෙම්බන්ගේ පිල්මාරු සිදුවීමත් යන ක‍්‍රියාකාරීත්වයන් වලින් ස්වායත්තව කල්පනා කරන්නේ නම් ඔබට මෙම තත්වය තේරුම් ගැනීමට තවත් පහසුවනු ඇත.) ඒ අනුව මහින්ද මහරජතුමන් අද වැජඹෙමින් සිටින තැන ඔහුට හිමිවේ. එතුමාට නොවඳිනා වැඳුම් වඳින ව්‍යාපාරික ප‍්‍රජාව, රාජ්‍ය සේවකයන්, ත‍්‍රිවිධ හමුදාව, ගායකයන්, නළුවන් පමණක් නොව රටෙන් අතිබහුතරයක් වූ ජනතාවත් එදාට වඳින්නේ අභිනව ජනාධිපතිතුමන්ටය. මෙවන් තත්වයක් යටතේ ජෙනරාල් විධායක ජනාධිපතිධූරය අහෝසි කිරීමට වත්මන් පාර්ලිමේන්තුවෙන් කැමැත්ත විමසා සිටිද්දී ඔය කෑමොර දෙන ඇමති රැල ඊට විරුද්ධ වී ‘‘නෑ, ඔබතුමා මේ රටේ රජකම් කරන්න ඕනෙමයි’’ කියමින් එ
යට ඡන්දය නොදී සිටීවිද??? නැත. ඔවුන් නිසැකවම එයට ඡන්දය දී ජෙනරාල්ට හිමිවූ බලය ඔහු විසින්ම ඉවත් කරගැනීමට ගන්නා උත්සාහයට සහය දෙනු ඇත. යම් හෙයකින් එසේ නොකළොත් රටේ ජනතාවත් එපා කියන, ජනාධිපතිත් එපා කියන විධායක කමක් තබා ගැනීමේ විපාකය විඳීමට වන්නේද ඔවුන්ටමය. මන්ද ඊළඟට ඒමට නියමිතව ඇත්තේ පාර්ලිමේන්තු මැතිවරණය නිසාය.මේ අතර ඩලස් අලහප්පෙරුම ඇමතිතුමන්ද මාධ්‍ය සාකච්ඡා පවත්වමින් රටේ ජනතාව ගොනාට ඇන්දවීමේ මහා ප‍්‍රයත්නයක නිරතවී සිටියි. එතුමා ජෙනරාල්ව ප‍්‍රශ්ණ කරන්නේ අනාගත වැඩපිළිවෙලක් ගැන අසමින්ය. ආර්ථිකය පිළිබඳව නිශ්චිත වැඩපිළිවෙලක් ජෙනරාල් ඉදිරිපත් කර නැති බැවින් එවැන්නෙකුට රටක් කිරීමේ හැකියාවක් නැතැයි එතුමා නිතර නිතර කියයි. එතුමා එසේ කියන්නේ මහින්දගේ ප‍්‍රතිපත්ති ප‍්‍රකාශය හදන්නට දායක වූ කොටස්කරුවෙකු ලෙස බවත් අප අමතක නොකළ යුතුය. ඒ අනුව එතුමා අපේක්ෂාවෙන් සිටියේ තමන් ගොණු කළ පචමල්ලට නොදෙවෙනි පොරොන්දු රැලක් ජෙනරාල්ද දෙනු ඇත කියාය.
නමුත් ජෙනරාල් ඒ කිසිවක් කීවේ නැත. ඔහු කීවේ තමන් විධායක ජනාධිපතිධූරය අහෝසිකර ජනතාවට සේවය කළ හැකි තනතුරක සිටින බවක් පමණි. එය ඉතාම සාධාරණය. මන්ද ජෙනරාල් ජනාධිපති වන්නේ ජනාධිපතිධූරය අහෝසි කිරීමටය. මහින්ද ජනාධිපති වන්නේ තවත් වසර 6ක් රජකම් කරන්නටය. ඒනිසා මහින්ද ජනාධිපතිවී කරන දේවල් ගැන ජනතාවට පොරොන්දු දිය යුතුය. නමුත් ජෙනරාල් පොරොන්දු දිය යුතු නැත. මන්ද ඔහු ජනාධිපතිධූරයේ සිටීමට බලාපොරොත්තුවක් නැති නිසාවෙනි.එබැවින් සියඹලාපිටිය, ඩලස් පමණක් නොව මෛත‍්‍රීපාල සහ අනුරයාපා පවා දැනගත යුතු දෙයක් තිබේ. එනම් මෙවර ජනාධිපතිවරණය යනු ආඥදායකත්වය සහ ප‍්‍රජාතන්ත‍්‍රවාදය අතර පවතින තරඟයක් බවයි. එක් අතකින් රාජපක්ෂතුමන් තම රජකම රැකගන්නට පොරකන අතර අනෙක් අතින් ජෙනරාල් විධායක ජනාධිපති ක‍්‍ර‍්‍රමය නම් ඒකාධිපතීත්වය අහෝසි කර ප‍්‍රජාතන්ත‍්‍රවාදය ස්ථාපිත කිරීමට මෙම සටනට පිවිස සිටියි. ඒ අනුව ජනවාරි 27 වෙනිදා උදේ වන විට ප‍්‍රකාශයට පත් වන්නේ මේ පිළිබඳව රටේ පරමාධිපත්‍යය හිමි ජනතාව දරන ස්ථාවරයයි. ඒ ඇරෙන්නට පාර්ලිමේන්තු මැතිවරණයක් තුළදී ජනතාව ගන්නා තීන්දුවත් සමග මෙහි කිසිඳු සම්බන්ධයක් නැත. මෙම ජනාධිපතිවරණයෙන් පසුව පැවැත්වෙන මහ මැතිවරණය ජයගැනීමට ඕනෑම පෙරමුණකට හැකිය. පෙරමුණු හා සන්ධාන වලට පමණක් නොව තනිව තරඟ වදින ජවිපෙට වුවද බාධාවක් නැත. එබැවින් ඉන් පසු පත්වන ඕනෑම ආණ්ඩුවකට තම පාලන සැලසුම් සාදා රට කරගෙන යා හැකිය. එයට ජෙනරාල් විසින් අහෝසි කරන්නට කටයුතු යොදනු ලබන විධායක ජනාධිපති තනතුර සිහිනෙකින්වත් රාජ්‍ය බලය යොදා වත්මන් ඇමතිරැල බිය වැද්දීමට කටයුතු නොකරනු ඇත.
මෙය මෙසේ ලිවීමට සිදුවුනේ අන් කිසිවක් නිසා නොව, මේ සියලූ සත්‍යයන් දැන දැනත් වත්මන් ඇමති මණ්ඩලයේ අතිබහුතරය විසින් රටේ ජනතාව ගොනාට ඇන්දවීමේ මහා සැලැස්මක නිරතව සිටීමයි. ඔවුන් මෙය දැන දැනත් ජනතාව ඉදිරිපිට ලැජ්ජා නැතුව මෙවැනි ප‍්‍රකාශ කරන්නේ ජනතාවගේ නොදැනුවත් භාවය ගැන පවතින දැඩි විශ්වාසය නිසයි. එනිසා තමන් කියන ඕනෑම බොරුවක් ජනතාව හිස්මුදුනින් පිළිගන්නා බවට ඔවුන් දනිති. එනිසා එතුමන්ලා මේ මෝඩ කතා කියන විට ජනතාව අත්පොලසන්ද දෙති. ඒ දැක ඇමතිතුමන්ට මද සිනහවක් පහල වේ. ඒ දකින ජනතාව උඩ පැන පැන අත්පොලසන් ගසති. සිනා වෙන ගමන් ඇමතිතුමන් මෙසේද සිතා ගනියි.
” අනේ මෙහෙමත් හරක් ටිකක්............! ”
